ភ្នំពេញ៖ លទ្ធផលឆ្នោតផ្លូវការនៃការបោះឆ្នោតជ្រើសតាំងតំណាងរាស្ត្រអាណត្តិទី៧ កាលពីថ្ងៃទី២៣ ខែកក្កដា ឆ្នាំ២០២៣ បានបង្ហាញថាគណបក្សប្រជាជនកម្ពុជាគ្រប់គ្រងអាសនៈបាន ១២០ លើ ១២៥អាសនៈនៅក្នុងសភាជាតិ។

នេះបើតាមបញ្ជីរាយនាមបេក្ខជនជាប់ឆ្នោតតំណាងរាស្ត្រនីតិកាលទី៧ ចេញដោយ គ.ជ.ប នៅថ្ងៃទី៥ ខែសីហា ឆ្នាំ២០២៣នេះ។

គណបក្សមួយទៀតដែលគ្រប់គ្រងអាសនៈនៅសភាគឺគណបក្សហ៊្វុនស៊ិនប៉ិចដែលកាន់កាប់បាន ៥អាសនៈ។

ទាំងគណបក្សប្រជាជន និងគណបក្សហ៊្វុនស៊ិនប៉ិច បានប្រកាសទទួលស្គាល់លទ្ធផលនេះឥតវ៉ា។

នៅថ្ងៃទី៧ ខែសីហា ប្រធានគណបក្សប្រជាជនកម្ពុជានឹងថ្វាយសារឧទ្ទេសនាមលោកបណ្ឌិត ហ៊ុន ម៉ាណែត ជានាយករដ្ឋមន្ត្រីថ្មីដើម្បីសុំព្រះរាជតម្រិះពីព្រះមហាក្សត្ររាជានុញ្ញាតឱ្យលោក ហ៊ុន ម៉ាណែត បង្កើតគណៈរដ្ឋមន្ត្រីសុំសេចក្ដីទុកចិត្តពីសភានៅថ្ងៃទី២១ ខែសីហា ខាងមុខ៕